投資賺被動收入 由儲蓄起步

曉陽早前留意到有個報道，指根據CNBC引述世界經濟論壇（World Economic Forum，簡稱WEF）嘅報告顯示，有近半（44%）40歲以下人士希望喺60歲之前退休。

但WEF嘅報告同時反映，當談到為未來做財務預算準備時，55%嘅受訪者表示無足夠嘅錢退休，或者唔確定需要幾多錢。調查仲發現，約有37%嘅40歲以下受訪者無考慮過停止工作甚至提早退休之後，需要幾多錢嚟維持正常生活。

隨住時代改變，愈嚟愈多人希望提早退休，但關鍵係，想退休就必需要喺無工作入息嘅前提下，有被動收入，而呢個被動收入，除咗嚟自個人嘅專長，例如因為產品分紅、版權稅等等比較專門嘅收入之外，仲包括投資收益。

不過，每次講到投資，唔少朋友總會講，邊度有資金吖！

其實資金點嚟？就算係百萬富翁，除非係出身豪門，否則好多時都係靠儲蓄起步。

所以，現實咁諗，先去儲蓄，然後再投資，會係最佳財富增值同增加被動收入嘅途徑。點樣儲蓄？曉陽唔係專家，但可以分享幾個朋友嘅心得。

例如可以選擇開通一個「儲蓄專屬」嘅銀行戶口，唔開通手機銀行服務、唔申請信用卡，甚至唔辦理提款卡、選擇中小型銀行開戶，令提款過程變得更繁複，久而久之，呢個戶口就會變成「只入不出」。

另外，現時網購非常流行，足不出戶就可以買到自己想要嘅物件，大家得閒就會睇購物App，好多時唔小心就會買咗好多未必有真實需要嘅嘢。所以，如果想減低購物意慾，最好就刪除購物App。

最後一樣，可能大家都有經驗，購物時選擇購買價錢較平嘅物品，但嗰件物品可能好快就壞，反而一次過買質量好嘅物品，往往更能慳錢。

（本欄逢周四刊登）